Noo geht’s in die Zigeinergass,
e Handwerkergass. Un do is die Kür mi’m Bernads Kathi schlicht un oonfach dorchgang. „Weil ich mit’m Franzi
net nor im Tischtennisklub vum Winklersch Matz war, un mol mit’m e ganzi Zeit
gang sin, wie die Johrmarker soon, hun ich des Haus gut gekennt.“ Ja saa mol,
forrwas is’n nicks do drauß wor? Un des werd jo noch schlimmer: „Ich hun dort
oft gspillt mit’m Potche Helmut. Im Summer hun mer uns im Garte vrsteckelt vun
dr Wess Anna zwische de Tippchesblume un hun Dokterches gspillt…“ Un des in
Johrmark? Des is jo ungeheierlich. Wie kann merr norr so etwas schreiwe? Tja,
wemm’s net gfallt, der soll halt die Pflicht lese. Ich bleib liewer bei der
Kür.
Iwer’s Lothringe hot de Griese Wess Mrejan eehre Jingstes
gschrieb. Un do is se wedder: die Weltgeschichte. Es Herz Margret un sei Schwester, es Leni, hun sich im Marschall Tito
un em General Feldmarschall Malinovski
ehre Badwann gebad. De Griese Wess
Mrejan eehre Jingstes schreibt i’me humorvolle, lockre Stil. Des is sehr
angenehm zu lese.
Hinnenaus, es Lothringe,
vun der Neigass bis an die Walachegass behandelt de Kramczynski Phedr. Der macht des akkurat wie e Ingenieur un fangt
mi’m Onfang on, mit der Onsiedlung. Die Kramczynskis
sin Buchenländer odder Bukowinadeitsche, wie merr noch saat. Des is wedder so e
Stick europäischi Geschichte, die wu in Johrmark hängegeblieb is. Un was muss
ich do schun wedder lese? Aah de Phedr hot
uf’m Tenn Dokterches gspillt. Awwer net mi’m Kathi; mit de „Kinn aus der ganz Nochberschaft“. Tja, wann am nimand
ufklärt, muss merr alles selwer rausfinne.
Merr kann mit Nome scheene
Wortspille mache un draus so Tittle: Scheiersch
hinne un vorre im Lothringe –
Gschrieb vum Scheier Kathi un verzählt vum … Scheier Kathi hinne im Lothringe,
ufgschrieb vum Fritstoffels (Scheuer) Kathi. Des is jo schun fast e
Nomepuzzle – zammstelle muss merr selwer. Awwer norr ka Hektik: Mer sin noch
immer im Johrmarker Gassebuch. Aah in dem Kapitel gebt’s so Einiches, was
wirklich lesenswert is. Merr muss sich immer wedder ingstehn: Na des hun ich
net gewisst.
Noo geht’s in die Kleegärter
un an die Miehl. Es Klemm Helen
kennt sich dort hinne gut aus. Un was war dort net alles loss? „Es Liss had
ledich e Kind vum Müller, des war de Pannerts Vettr Balzer.“ Iwer so etwas redd
merr doch net. Un jetz schreiwe se’s aah noch ins Buch. Naa, naa, naa!
Es Kasparis Kathi beschreibt (aah) die
Kleegärter un die Walachegass. Bisher hun die Rumänre
noch ka großi Roll gspillt. Awwer jetz tauche se scheen langsam uf. Un do lese
mer vun Leit aus Bessarabien. Rumänien war jo mol vill greeßer wie heit.
Es Brill Resi waaß aah so Einiches iwer die Kleegärter, awwer aah
iwer die Pobeda in neijrer Zeit. Asso wann ich des net missverstann hun,
noh stammt em Brill Resi sei Motter
aus Deitschland. Was es in Johrmark net alles gewwe hot. Des sin alles so Gschichte,
die kann merr eigentlich norr aus so’me Buch erfahre. Wu halt Leit frei vun der
Lewwer iwer sich un ehre Nochberschaft verzähle. Die Pobeda is die letzt Gass
mit Heiser.
Noo kumme die Johrmarker
Kreiz- odr Zwerchgasse un Gässl’cher. Des is e zimlich undankbari Sach,
weil mer kann iwer nimand schreiwe. Awwer es Fritstoffels Kathi un’s Zernersch
Anna mache die kloone Gasse genauso intressant wie die große. Un in so’me
große Dorf wie Johrmark ware se sehr wichtich, weil „mer de Wech abkerze hot
kenne un net rundrum gehn hot misse“.
Esse halt Leib un Seel zamm.
Un dass merr vun dem ville Lese net umfallt – des is jo aah Arwet -, geht’s zum
Schluss noch um’s Koche. Es Streitmatter
Anna hot ausfiehrlich festghall, was eigentlich alles aus uns Johrmarker
die beste Schwowe im ganze Banat gemach hot.
De Luzi losst do druf aah noch de
Thuwwak, die Pheife un die Zigarettl zu ehrem Recht kumme. Frieher hot des
forr vill Männer zu’me gude Esse gheert un es ganze Haus hot gstunk. Heit misse
se nausgehn rauche. Aah die Weiwer. Un des is gut so.
Mit Spitz- un Herkunftsnome, die ball vergess sin, ufgschrieb vum Tassingersch Erich, un ooner langer
Reih vun 300 Sprich un was mer in
Johrmark so gsaat hot – festghall vum Zernersch
Anna – is es Lewe am Enn. Awwer noch net es Johrmarker Gassebuch. Es Seiwerts Kathi hot noch e Bericht iwer
die meh wie 30.000 Johrmarker gschrieb, die wu die Gassebicher bestimmt nemmi
lese werre. Sie ruhe uf de zwaa Johrmarker Kerchuffe.
Un weil’s noh’m Tod angeblich
nicks meh gebt - aah des siehn net alle Leit so -, is des Doppelbuch noh 1210
Seide wirklich am Enn. Awwer net forr mich, weil ich hun jo eerscht bei der Seit
685 mi’m Lese ongfang. Asso hun ich de dickre Brocke noch vor mer. Ich muss
jetz halt die Supp un’s Hinglsfleisch mit Krumper un Krien noh’m Bradl un de
Torten esse. Macht nicks, wann merr hungrich is, spillt die Reihenfolge jo
sowieso ka Roll.
Berns Toni
Keine Kommentare:
Kommentar veröffentlichen