1946. Des war ka gudes Johr forr mei Urgroßvatter, de Berns
Vedder Toni. Sei ooni Tochter, es Lissje war in Russland – die zwatt, es Anna, hot därfe de Hoom bleiwe, norr sei Mann hot gehn misse - un seim Sohn, em Toni,
sei Versteck vor de Schandare, in der Altgass uf’m Bodm vun seiner Schwester
war noch net ausgekielt. Er, mei Urgroßvatter, hot mit seiner zwatter Fraa un dee
zwaa Kinn vum Liss, es Anna un de Toni, versucht, iwer die Runde zu kumme. Sie
hun selmols schun in der Neigass gewohnt.
Des war nateerlich net so oonfach. E bissje Feld un aah
Wingert war jo do. Na ja, forr’s Esse hot des bissje Feld un aah de Hausgarte schun
genuch hergewwe, awwer es is halt ka Geld ins Haus kumm so wie heitzutach. Do
war zwar noch e Pension vum rumänische Staat, awwer forr die hot em Lissje sei
Mann, de Pheder, – des war aah de Sohn vun meim Urgroßvatter seiner zwatter
Fraa, annerscht gsaat, hot mei Berns-Oma ehre zugebrungne Bruder gheirat ghat,
heit meecht mer soon, des war e Patchwork-Familie, – 60 km vor Stalingrad sei Lewe losse misse.
Ich hun do unlängst mol wedder in vergessne Schublade im Keller
rumgsucht un e Dokument funn, des wu mer uf de eerschte Blick gsaat hot, dass
mei Urgroßvatter, de Berns Vedder Toni, wahrscheinlich forr die Fortzahlung vun
der Rente gekämpft hot. E geeles Blaat Papier. E sogenannti Legalizare. Es muss
sehr wichtich geween sin, weil es is uf e Stick Leinwand ufgepeckt. Un uf dem
Papier werd bestäticht, dass mei Oma, es Berns Lissje, im Johr 1943 vum
MINISTERUL APĂRĂRII NAŢIONALE, CASA INVALIZILOR, ORFANILOR ŞI VĂDUVELOR de
RĂZBOI e Pension vun insgesamt 8910 Lei kriet hot. Mei Urgroßvatter hot des
Schriftstick am 8. Fewer 1946 ausstelle geloss vum Notar Dr. Alexandru Morariu.
Des hot ne 140 Lei kost.
Un des kännt selmols so gelaaf sin. Mei Berns-Oma, asso es
Berns Lissje – des is es geblieb bis zu ehrem/seim Tod -, hot forr sei gfallne
Mann e Pension kriet. Er war jo bei de Rumänre ingerickt. Un wie’s Lissje no uf
Russland hot misse, hun die Behörde die Zahlung ingstellt, weil die Empfangsberechticht jo net do war. Ich waaß net genau, ob des so war. Des wär
halt e Fall forr die Historiker, hun ich mer gedenkt. Was ich awwer vun meiner
Motter waaß, is, dass die Rentenzahlung wirklich ingstellt is wor. Un zwar
hot’s ins Platz 9 Joch Feld gewwe. Un mit dem un dem annre Feld un dem Stick
Wingert is mei Urgroßvatter, de Berns Vedder Toni, in de 1950er Johre noh in
die Kollektiv gang.
Asso is die Legalizare vun selmols wahrscheinlich ka Beweis
forr meim Urgroßvatter sei Kampfgeist – wie ichs heit, 67 Johr späder, geere
gsiehn hätt -, sondern norr e notwennichi Akte, um an die 9 Joch Feld zu kumme.
Un merr brauch aah ka Historiker meh. 9 Joch Feld forr e Menschelewe, awwer net
uf Dauer, norr forr e paar Johr, nemol so lang wie des Menschelewe gedauert
hot. Mei Großvatter war 29 Johr alt, wie er im 42er gfall is.
Berns Toni
Keine Kommentare:
Kommentar veröffentlichen