Ich hun mer jo norr so gedenkt

Kapitel I

Do unlängst hun ich in der ADZ (des is die ALLGEMEINE DEUTSCHE ZEITUNG FÜR RUMÄNIEN) – geles, dass die Flissichgas-Pipeline „Nabucco“ gebaut werd un aah dorch Rumänien geht. Sie kummt vum „Kaspischen Raum“ un geht iwer „die Türkei und den Balkan nach Westeuropa“. So stehts in der Zeidung. Und dort war aah e Landkartskizze, ganz oonfach, oone Ortschafte.

Awwer ich moon, die „Nabucco“ geht aah dorchs Banat. Mer wär des jo gar net so ufgfall wann ich net in dem Artikel aah noch dee Satz geles hätt: „In den vier rumänischen Verwaltungskreisen sind insgesamt 16.000 Grundstücks- und Immobilienbesitzer von der Trassenführung betroffen, also zu entschädigen.“

Leit, do fließt Geld. Bei so’me internationale Projekt geht’s um Milliarde. Do werd gut gezahlt forr Grund un Heiser. Mer is ganz warm um’s Herz wor, wie ich mer vorgstellt hun, Mensch, jetz wär fleicht net schlecht, wannst dort unne, bissje abseits vun Johrmark, vleicht in der Lukin odder in Scharrad e Grundstick hättst; mi’me Haus druf wär noch besser.

Ich hun des meiner Wes gsaat. Awwer besser hätt ich’s geloss. Ich will Eich sei Antwort aah erspare. Na ja, ich hun mer jo norr so gedenkt.

Kapitel II

Awwer manchesmol zahlt’s Denke sich wirklich net aus. Heit morjet hun ich die Zeidung ufgschlaa, de DONAUKURIER vun Ingolstadt, un sofort is mer uf der Wirtschaftsseit e Titel in die Aue gfall: „Kein Erdgas für Nabucco“. Un do steht: „Schwerer Rückschlag für das von der EU unterstützte Nabucco-Projekt: Die geplante Pipeline soll kein Gas vom aserbaidschanischen Gaskonsortium Shah Deniz II bekommen.“

Ich moon, ich geb dee Gedanke mit dem Grundstick in Scharrad odder der Lukin jetz wirklich uf. No is aah wedder Ruh im Haus.

Berns Toni