Mensch, Annemarie!

Eigentlich hatte mei bessri Hälft un ich uns vorgholl, am eerschte Weihnachtstach oweds die Thomaner zu schaue. Awwer noh hun ich mer uf’m Eerschte noch de Bundespräsident ongschaut un onghorcht. Un wie des halt schun so geht, sin mei Fraa un ich bei der Helene-Fischer-Show hänge geblieb.

Ich muss zu meiner Schand zugewwe, dass ich die Fraa vleicht oon- odder zwaamol gsiehn hun, un des war immer norr so im Korz-nin-Schaue bei so’me volkstümliche Playbackgedudls. Awwer jetz... Ich sin noh’m eerschte Stick nemmi wechkumm vun dem Sender.

Ich hun immer gemoont, mi’m Harald Junke is de letzt groß deitsch Showmaster gstorb un mit ehm des Metier forr immer vun der deitsch Unterhaltungsbiehne verschwunn. Weil, was noh dem Berliner kumm is, kann entwedder norr singe, odder norr redde, tanze kann glei gar kooner. Un jetz wirbelt do uf mol jemmand iwer die Biehne wie de lebhafteste Friehlingswind. Ka Shomaster – e Entertainerin. So haaßt des uf Neideitsch, moon ich. Un was forr ooni. Ka ufgsetzti Freindlichkeit, nateerlich wie die Natur selwer. Un was die Fraa alles kann: redde, tanze, singe in alle meegliche Genres vum Jazz bis zu der Oper.

Forr die Helene Fischer gebt’s wirklich norr e oonziches Qualitätssiegel: Wahnsinn! Wie kann merr sich e kinstlerischi Vielfalt uf so hochem Niveau iwerhaupt erkläre? Was muss die Fraa forr Gene hun odder was forr e Geist muss in die gfahr sin?

„Na was forr oone?", hot mei Ongetrautes gemoont. "E Johrmarker Geist! Waaßt du net, dass de Helene Fischer ehre Taafgod odder Fermgod, so genau waaß ich des aah net, e Johrmarkerin is? Es Annemarie.“ Un noh hot’s mer noch verzählt, wie des soweit kumm is. I’me Iwergangswohnheim forr Spätaussiedler soll die Gschicht sich abgspillt hun.

Ich moon, es handelt sich ehnder um e Firmung wie um e Taaf. Weil de Geist, jetz net unbedingt de Heilich Geist, awwer bestimmt de Johrmarker Musikantegeist muss selmols in des Kind gfahr sin. Dass es Annemarie dee Geist in sich traat is so gut wie sicher, dee hot doch jeder Johrmarker.

Ich uf jede Fall staun mich jetz nemmi, dass die Helene Fischer so toll is. Jo, un mit dem Johrmarker Geist (net aus der Flasch) is des Phänomen aah leicht un forr jede Mensch verständlich zu erkläre.

Berns Toni