Sonntag, 14. März 2010

Schnell, so lang noch was do is

In der Temeswarer Wochenzeitung AGENDA werd e Interview veröffentlicht unner dem Titel: Foştii deţinuţi politici şi deportaţii pot primi bani frumoşi de la stat. Des geht dich nicks on, hun ich mer gedenkt, du warscht nie ingsperrt un aah net deporteert, un forr die Retreerte gebts nicks. No hun ich awwer des Interview mit der Anwältin, sie haaßt Loredana Bugarschi-Lăzărescu, doch ganz geles. Un ich son eich Leit, ich sin aus'm Staune nemi rauskumm.

Wer berechticht is, des Geld zu beantrage, hot de Reporter wisse wolle, un die Anwältin hot geantwort: "...persoanele care au suferit astfel de condamnări", un wann die schun gstorb sin, aah noch "soţul supravieţuitor, respectiv descendenţii până la gradul 2, copiii şi nepoţii". No hun ich mol e bissje nohgedenkt: Mei Berns-Oma war uf Russland verschleppt, ich hun  noch e Schwester un e Kusin. Asso misst merr des Ganze uf drei tale. Bei de paar Lei, wu die zahle werre, zahlt des sich bestimmt net aus. Asso spille mer weider Lotto.

Awwer jetz. Des is de Hammer. Der is mer uf de Kopp gfall. Ich sin noch ganz tomisch. De Zeitungsmacher hot wisse wolle, wivl dass es iwerhaupt gebt. Uff, is mer heiß. Mei Tastatur vum Computer fangt on zu schmelze. Awwer ich will's eich doch verrote, obwohl ich mer gschwor hun, des Geheimnis forr mich zu bhalle un, wann's norr irgendwie geht, sogar mei Schwester un mei Kusin aus'm Spill zu losse. Die Anwältin hot gsaat, e politischer Häftling hot 250.000 Euro kriet un e deporteerti Familie 200.000 Euro. Sogar vun 500.000 Euro un ooner Million Lei is die Redd. Jetz hipperwentileer ich. Die Luft bleibt merr weg un ich siehn nicks meh wie Zahle. Heit Naacht hun ich getroomt, dass ich mer e Vermögenverwalter angascheert hun.

Noh hun ich nomol geles un sin do hänge geblieb, wu die Anwältin saat, dass "practic legea lasă la aprecierea instanţei de judecată să stabilească cuantumul acestora", asso die Heecht vun der Summe, wu vun Fall zu Fall ausgezahlt werre soll. Endlich mol wedder so richtichi Heimatluft. Ich hun se sofort gspeert un in de altvertraute Katergoriee zu denke ongfang.

1.) Ich brauch e gute Anwalt. Wer kännt oone kenne un was kännt der verlange?
2.) Der Anwalt muss nateerlich e gute Richter kenne, wu am Temeswarer Gerichtshof forr die Deporteertefälle zustännich is. Mit wivl meecht der mit sich redde losse.
3.) Des muss alles awwer schnell gehn, weil ich hun mit meim Rechner gerechnt dass 200.000 Euro x 150.000 Mitglieder aus der Asociaţia Foştilor Deţinuţi Politici din România (die werre ehre Geld bestimmt verlange, sunst wäre se jo net dort ingetret) = 3.000.000.000 Euro. Des is jo jetz schun e scheene Batze Geld un do sin mer Schwowe un Sackse noch gar net dabei. Na die werre Aue mache.

Odder annerscht gsaat, die Richtre un Anwälte werre ehre Spass und der oon un anner aah e volli Brieftasch mit der Legea 221/2009 hun. Ich moon ich verzähl des doch alles meiner Schwester un meim Kusin. Die solle sich drum kimmre. Unser Berns-Oma hot des bestimmt verdient. Un wann noh was rausschat, na dann schau merr mol weider.

Berns Toni

Keine Kommentare:

Kommentar veröffentlichen